【特訊】英超周六（21日）晚間早場，車路士作客3比0大炒韋斯咸，聯賽2連勝。尼高拉斯積遜今場不再敗家，開賽早段已經起孖，下半場再助攻高爾彭馬整多粒，至於曼聯棄將查頓辛祖今場送助攻入第一球，連續兩場交出助攻，大打爭氣波，以表現證明坦哈格不識寶。

　這場「倫敦打比」戰況一面倒，車路士開賽4分就開紀錄，查頓辛祖送靚直線，尼高拉斯積遜盤過門將艾路拿大細龍門入網，領先1比0，入波後高爾彭馬又有機會，可惜他射門貼柱出界，18分鐘尼高拉斯積遜又單刀建功，今次送助攻是摩西斯卡些度，韋斯咸其後古達斯一度送球入網，但越位在先，車路士半場領先兩球。

　易邊後車路士一次快攻，尼高拉斯積遜引開對方後衛，讓走空位的高爾彭馬射成3比0，大比數落後的韋斯咸變陣，換入米查利安東尼奧、卡路士蘇拿同阿素迪沙斯搏殺，不過車路士後備席，柏度尼圖、祖奧菲歷斯、尼干古等人落場，仍然控制大局，最終車路士贏3比0完場。

　另外，昨夜戰至今晨六場英超賽果：

　修咸頓一比一葉士域治，熱刺三比一賓福特，利物浦（迪亞斯兩球）三比0般茅，李城一比一愛華頓，富咸三比一紐卡素，阿士東維拉三比一狼隊。◇