即將上映的港產片非常熱鬧，其中包括有這套《裡應外合》，當中三位主角周家怡，楊天宇（Angus）及馬思惠（Macy）就來到Hoytv和主播俞詠文（Angela）分享拍攝的趣事及點滴。對於這套電影拍畢三年才上映，首次擔正男主角的Angus直言非常期待：「當然係好興奮啦！但都好有壓力！始終對於個票房，或者觀眾嘅反應我都會好在意，希望會有好成績！其實我呢一個月都係瞓唔著！」

　為了這部第一次做男主角的電影，楊天宇可以說是「搵命搏」：「諗返開拍前嗰段操練時間，真係猶如地獄，當時練到成身傷，而家都仲未好返！嗰種係形容唔到嘅辛苦！一個月裏面，練曬所有門派嘅武術，嗰陣時我一個禮拜練足六日，每日練四個鐘，教練唔當你係演員，直情當你係運動員，有好多時候練到暈，教練淨係話o唔ok？ok再來啦！有一次晏晝練到爆咗手指，到夜晚黑去舉鐵嘅時候，教練就話其他手指冇事就練啦！幾hardcore呀！」

　而當中的對打場面，Angus坦然有不小心打中Macy的下巴:「佢嘅左勾拳打到我下巴！不過唔緊要，我都有踢親佢！因為都係第一次接觸動作戲，而我嘅部份主要用腳，所以唔小心傷到對手在所難免！好彩大家無論樣貌同身材都係真材實料！哈哈哈！」

　周家怡亦表示非常佩服他們兩個：「嘩！你哋咁樣練法，仲生存到都算係咁喇！我見到Angus喺天台度練單槓，我幾驚佢飛咗出街呀！其實我都好明白拍動作片，傷咗都仲要練嗰種感受，心理壓力好大又怕自己做唔好，有好內疚嘅感覺！所以都唔係太想拍動作戲，除非沒有足夠嘅時間準備啦！」◇