由阮兆祥、梅小惠、江欣燕主持《友乜唔講得》今（二十三日）晚播出的第七集嘉賓是胡楓，胡楓更刻意在衣著上與三位主持襯晒色，相當暖心；節目中還曝光了不少胡楓昔日在EYT的精彩演出。
出名是「開心果」及「好好先生」的胡楓（修哥），被相識多年的小惠及欣欣踢爆私下其實相當佻皮、幽默，小惠說：「佢好犀利嘅，佢永遠搞笑唔笑，引佢又唔笑，永遠搞到我哋自己笑，佢就唔笑，教識咗我哋點樣笑與唔笑之間。」
談到修哥，欣欣憶述入行首部電影即與修哥合作，並謂因而發現修哥原來有櫈都唔願坐：「套戲我同君如係演舞女，咁ending好多困獸鬥嘅戲，我同君如都好眼瞓，一見到櫈就坐，但修哥唔坐㗎喎，不停喺度行行行。到我諗住畀番張櫈佢坐，修哥就話：『我唔坐嘅，你哋後生坐啦』。」修哥事後笑言其實自二十一歲開始已有「行路養生」習慣：「我一九五三／五四年開始行，行到而家喇，求其有地方就行。」祥仔聞言即大搞爛gag：「咁咪讀萬卷書不如行萬里路？」修哥即發揮幽默本色回應：「啱喇，我冇乜學問吖嘛！」
欣欣又爆出修哥十分著急面上的「長壽癦」，完全「唔畀掂」，不過，修哥聞言卻搞笑摸面澄清謂：「我希望啲靚女掂我，但阮兆祥嗰啲就唔好掂喇！」他續指長壽癦上的長壽毛十分吉利，更笑言謝賢十分羨慕他有長壽癦，更曾經按捺不住夾生掹了一條私人珍藏：「有次四個小生去旅行，大家喺度講緊嘢，佢就喺度摸摸摸然後掹咗一條，仲要珍而重之咁收埋。」修哥席間還大談拍攝《四個小生去旅行》的趣事，並直認曾與謝賢及曾江嗌交！
二十一歲入行已馬上坐正做男主角的修哥，被三位主持夾攻要求講出「心目中最靚嘅係邊位女明星」，並在祥仔引導下，大爆昔日其中一位好拍檔吳君麗的怪習慣。祥仔：「我見吳君麗同你擁抱時起晒槓」，胡楓：「唔單止咁，仲批踭添！」說畢更搞笑地還原昔日遭吳君麗推開的畫面，修哥又笑指當時被推後的回應是：「麗姐，我要睇跌打喇！」笑爆肚皮。◇
