周六音樂會在一片紫色燈海下開始，舞台以「L」字形設計，並以舞台劇形式開場，背景是車站月台，舞蹈員穿梭街道，於人來人往中，千嬅一身紫色服裝高貴亮相，從頭髪到衫裙都是其招牌紫色，並以《最好的債》打頭陣、之後演唱《你會愛的人》、《直覺》時插入陳奕迅《無條件》一曲，全埸觀眾興奮大叫，她唱罷《麥芽糖》後再換上另一件紫色的長裙，一口氣唱出《芬梨道上》、《冬天的故事》、《知更》、《沒關係不是愛情》多首歌曲。不過今次沒唱太多大熱歌曲，反而以多首Side Track歌曲以故事形式演繹，歌迷仍十分受落，反應熱烈。
千嬅到唱《冬天的故事》時配合飄雪效果，甚有意景，觀眾大讚：「你好靚女！」千嬅聽到甜笑揮手答謝。一連唱了近十首歌，當穿第三套紫色裙上場，千嬅稍露腰姿獻唱《塔羅迷》，唱畢她跟觀眾打招呼：「你哋好嗎，好耐冇見，上呢個舞台之前，我用咗好耐時間諗咗好多嘢，我應該講啲乜嘢，同時我亦都用咗好多時間諗吓有啲咩係唔講得！」她解釋演唱會以「B Minor」為主題，其實除了有Side Track意義之外，「喺呢幾年裡面，其實自己有好多唔同嘅經歷同感悟，Minor係Be Humble謙虛，當你懂得謙虛嘅時候會睇開啲，之後會將自己縮細再褪後睇清楚啲，好多時候好容易將自己成為故事嘅主角，但當你退後睇清楚啲嘅時候，我只不過係你哋故事裡面一個好小嘅角色，當你慢慢去消化嘅時候，你就明白好多嘅問號未必屬於自己嘅課題，可能係大家嘅課題，想到呢度，就好清楚知道唔需要浪費好多時間去特別緊張同擔心，就係做返自己囉！」
千嬅獻唱完《E714342》，表示每日有廿四小時，但要花很多時間去消化別人講的說話感覺會好疲累，慢慢便遺失了自己，迷失在這地球，為何不順性放手，於飄浮時間過程中以音樂回憶找回自己：「我見到呢道光，同埋見到你哋，喺呢個咁特別嘅音樂會，你哋嘅掌聲唔止係鼓勵，仲非常有份量。我都係唔好講嘢，好易瀨嘢，唱啦！」
千嬅換上第四套紫色裙出場，並大顯身手以鋼琴彈奏《再見二丁目》，雖然她苦練了4個半月，仍彈錯音調，她即失笑重新再彈，觀眾給予鼓勵齊聲伴唱，於末段依然有錯漏，彈完整首歌，千嬅也搖頭尷尬說：「死啦，陣間實被林夕鬧！」當千嬅唱到《愛人》時已表現得好感觸，及至唱《一二三三二一》期間多次哽咽唱不下去，更兩度以手拭淚，歌迷即時大嗌「千嬅加油」為她打氣！千嬅感觸地說：「好開心好感動今日做到呢個演唱會，點解咁，叫咗今日自己唔可以喊，但已經好叻！真係好感動，行到嚟呢步好唔容易，我要感謝你哋每一位朋友，山場水又遠好似出埠咁走來我個音樂會，但今次時間好短兩個鐘一場、兩晚，但對我來講呢個係永恆嘅！係咪好奇怪咁嘅時勢仲咁大膽衝出嚟開演唱會，係為咗好愛我嘅人，一路支持我嘅人，好擔心我嘅人，好耐冇見過曾經俾機會我栽培過我嘅前輩，好多屋企人，我爸爸媽媽，對我有期望嘅人，我一定會返嚟再開演唱會，同大家講我好掛住你哋！」
千嬅直言從小硬頸性格至今沒變，她於潮州人家庭長大好倔強，做女好想照顧到屋企，所以從小到大都好硬頸：「我幾唔開心幾痛苦都好，我係唔會喊，仆到個頭流血我都係唔會喊嘅人，因為我覺得被人知道我好痛會好傷心好煩，覺得自己好廢，所以我從來都唔喊，但我點解大個唱歌，見到我失控咁？好多時候喊係人哋求婚好感動，人哋失戀同我傾訴我好傷心喊，見一啲感動時刻戥人好似崩潰咁喊，好多時候我冇分享過，我見人哋呢啲感動時刻就借啲意將自己之前唔開心嘅攝下攝下落去一齊喊，所以大家明白我無端端會咁感觸，因為啲眼淚除咗有每個陪我成長嘅你哋分享之外，有小小不覺意自己楔入去share咗，我只係少表達自己，因為我呢種倔強同強悍，真係會慢慢會令自己覺得唔係女人，但呢幾年學識比較多時間回歸家庭，發現一樣嘢我係女人嚟嘅！我覺得最大人生嘅進步，我承認自己係會痛、會傷心、會講，咁呢樣嘢好重要，要承認自己嘅感受，先活着！」
千嬅感謝兒子教她明白：「佢問我做乜喊，我唔認，但對眼腫了，原來騙不到人。這令我明白我是可以喊，我今日喊是開心，順風順水開騷好high， 好多掌聲鼓勵令我驕傲，但當我最大阻力困難時，得到你們掌聲才是人生的高光時刻。我最大嘅贊助就係我所有嘅音樂，所有作曲填詞俾我嘅朋友，因為佢哋嘅作品加持左我嘅人生，加持左我嘅音樂夢！」千嬅亦感激終於排除萬難，可以返到「屋企」開到第34巡迴演唱會，這記憶是一世的！
當穿上第五套紫色連身修腰魚尾裙行近粉絲堆唱《小星星》時，千嬅太high險被長裙絆倒：「吖，跌死我⋯⋯無事嘅，跌低咪起返身囉！」之後她上訴要彈多次《再見二丁目》，雖然仍有瑕疵，但觀眾收貨拍掌鼓勵唱和，哄得千嬅也即拍掌哈哈大笑。
於Encore環節時，千嬅指自己人生最低落時曾予以勇氣，寄語大家不要因一、兩個人否定自己，反過來要感謝及擁抱不喜歡你的人，並表示這幾年大家也遇上困難日子，千萬不要容易放棄。由於粉絲十分熱情，千嬅再度encore選唱《姊妹》，並笑言大家都要身體健康，唱到人瑞之齡她仍會繼續唱下去，但唱罷觀眾仍不肯離場，千嬅為多謝歌迷的愛戴，即場唱多首《姊妹》，雖然已超時，千嬅說：「我包（罰款）啦，好冇呀？」最後，千嬅以《飛女正傳》作為落幕歌曲。
今次來捧場嘉賓有千嬅老公丁子高和兒子Torres、千嬅父母、 Bob與太太、陳浚霆、焦浩軒、蘇韻姿、關嘉敏、炎明熹、黃柏高、劉倩婷、李丞責及何麗全等，其中炎明熹被大班觀眾上前集郵引起小騷動，要工作人員出動制止。◇
