由王祖藍擔任主持嘅全新節目《有個閨密叫祖藍》本月三十一日起，一連八個星期晚二十二時三十分喺翡翠台播出。異性朋友多到數唔晒嘅祖藍，今次可以話碌盡人情卡，請嚟唔同老友雲集節目，除咗有認識唔耐，有近日憑《聲生不息》人氣急升嘅Gigi炎明熹，仲有行內資深代表搞笑鼻祖之一苑瓊丹。

　除咗Gigi同苑瓊丹子之外，官方預告片仲見到《閨密》另外六位嘉賓分別係蔡少芬、胡杏兒、薛凱琪、容祖兒、楊千嬅同陳松伶。佢哋八位女嘉賓因唔同原因同祖藍成為絕頂「閨密」好友，仲因為同祖藍一樣「夠晒無聊」成為佢哋嘅共通點。為了令八位嘉賓可以邊傾邊玩，祖藍刻意將拍攝日程安排到「有咁忙得咁忙」，每集嘉賓除咗要完成指定「閨密任務」，仲要額外被加碼進行其他小遊戲，當中有小學雞級別嘅、又有「互相傷害」Mode、「真情」Mode、烹飪鬥室同時光倒流情景題等，務求觀眾同嘉賓每一刻都有驚喜。

　祖藍受訪時話：「拍呢個節目真係好忙，都辛苦節目組度咗咁多嘢出嚟。最搞笑係，每個上完嚟嘅嘉賓，都同我投訴話：『乜唔係上嚟傾偈咋咩？點解忙得咁緊要架？好攰呀！』」

　女嘉賓夠晒豐富，不過問到怕唔怕會激嬲太太李亞男時，佢就話喇：「我老婆識咗我咁耐，都知我真係有唔少異性好友，但佢相信我係清白嘅。不過佢為咗安心起見，都喺節目一開始透過節目組同我約法三章，仲定埋『三不規條』，係咩就唔講住，大家睇第一集就知（口架）喇，亞男同我囡囡都會周不時喺節目『客串』。」

　祖藍又話拍攝過程最令佢驚喜嘅，是有啲「閨密」心底事，完全透過節目先知道：「好似第一集嘅嘉賓蔡少芬咁，原來佢嬲過我嘅，但我當時真係完全唔知，我事後聽返都覺得自己好過份。」◇