青衣長康邨康美樓因為出現兩名確診病患者，疑有大廈傳播風險，故政府漏夜緊急疏散逾百名住客，並送往檢疫中心隔離。其實長康邨於七十年代末落成，擁有舊香港的屋邨特色，故不時都有劇組前往拍戲，本地點播網絡平台hmvod去年播出的原創神劇《向西聞記》，其中的兩集單元《碌架床》亦於康美樓實地取景拍攝，演員包括林雪、王宗堯、鄧健泓、石詠莉及蔡明思等。

　打正旗號描述香港社會荒誕離奇之《向西聞記》，去年在hmvod及NETFLIX已先後上架，明日（二月十三日）起逢周一至周五晚十時亦會在viuTV播出。單元《碌架床》就講述一家六口迫住三百呎公屋單位的各種悲哀，像鄧健泓王宗堯扮演的兩兄弟連同老婆扑嘢都冇地方，「老爺」林雪又因為「細家嫂」蔡明思霸住廁所沖涼，撞正肚痾而在家中大廳「瀨屎」，這幕由林雪「瀨屎」開始到鬧仔的嗌交戲，全程在康美樓單位拍攝，而這幕戲至今的香港總點擊率，已超過六百萬人次。

　林雪透過新聞報道已得悉康美樓「出事」，他說：「又會咁橋嘅？拍嗰陣記得環境幾好，乾淨，樓上電梯大堂又大又通風，希望受感染確診嘅病患者快啲好番，疫情早日過去，不過大家呢排都真係要注意衛生，小心身體。」

　王宗堯除了拍《碌架床》外，原來早前他亦在康美樓拍攝港台《獅子山下》。關心社會的宗堯對疫症肆虐，感到既憂心又激氣，「政府嘅做法同林鄭嘅回應真係好差，都冇喺經驗中吸收教訓，仲叫市民唔好出去食飯、唔好約朋友、唔好睇戲、唔好做運動，乜都唔做得但又唔封關，令到香港人更加冇晒生活，市道靜到黐線，所有嘢相關掛鈎嘅時候，影響晒香港成個經濟，香港人依家真係好慘，更加擔心嘅係呢次青衣社區爆發，隔咗咁多層樓，咁住中間層數啲人點？其他隔離層啲人又點？同埋依家咁多唔同社區爆發，啲人又走甩又唔隔離，又遵守唔到規則又冇法搵到佢哋，警察又唔做嘢又唔拉人，衛生署又做唔到啲乜嘢，令到隱形帶菌者周圍走，上次沙士就話某幾個社區爆發，但我覺得今次有好大機會好多地方會有呢啲社區爆發，係好驚。」

　宗堯指今次武漢肺炎傳播快速，一個傳一個實在非常危險，所以他正不停撲口罩及搓手液，並將物品率先俾發有需要人士使用。◇