明日（二十日）喺香港擺酒嘅鍾欣潼（阿嬌）昨日（十八日）就同老公賴弘國喺尖沙咀進行簽紙註冊儀式。英皇集團主席楊受成、英皇娛樂行政總裁集團許佩斯、英皇娛樂行政總裁集團營運總裁霍汶希，及英皇一班藝人包括：容祖兒、古巨基、蔡卓妍、關智斌、鄭希怡同老公梁學儲都一早到場。

　儀式在下午近五點開始，二人宣讀完誓辭便交換結婚戒指，之後便情深一吻，期間祖兒大叫：「好嘢！錫多啖，錫唔夠喎。」錫錫後就開始簽紙儀式，英皇集團主席楊受成及賴弘國父親分別任阿嬌及賴弘國嘅証婚人；簽紙後四人合照，Mani話：「楊生，挨近啲影相啦。」楊生即刻笑說：「我驚Michael嬲呀。」及後一眾英皇藝人齊齊起哄同阿嬌講：「我唔捨得你嫁呀！」阿嬌還擊：「我好想你哋嫁呀！」祖兒再話：「嫁出去嘅水等如潑出去嘅女。」心水清嘅阿Sa就即刻篤爆，「係咪講錯嘢呀？好似係嫁出去嘅女等如潑出去嘅水喎。」全場即刻大笑。簽紙儀式完結後，一對新人就同親友影大合照。

　隨後，眾人移師室內向長輩斟茶，二人首先跪地向老闆楊受成斟茶，並由祖兒客串「大妗姐」，飲過茶後，老闆就向賴弘國「訓話」：「你要好好對她（阿嬌），不好的話你就不要來香港。」十分搞笑。◇