香港災難大片《焚城》11月1日正式獻映！電影首日上畫累積票房衝破380萬，勇奪開畫票房No.1外，更成為2024年下半年最高開畫票房港產片，淡市之下創出佳績，團隊上下非常振奮！謝君豪、王菀之（Ivana）、王丹妮（Louise）、何啟華（Dee）、魏浚笙（Jeffrey）、林家熙（Locker）及許恩怡（Natalie）上畫日更組成謝票先頭部隊，四出到戲院答謝觀眾支持。當中4位男士以及Louise更身穿白背心搭上消防制服出場，英姿十足，他們在現場除了公布票房好消息之外，更同時宣布《焚城》X《破・地獄》限量電影套票，同日開售三小時內經已全數售罄，亦首度公開一眾演員以消防員造型拍攝的「一世隊友2025慈善月曆」，並即將進行慈善義賣。喜訊接二連三，加上演員們齊心努力宣傳，成功焚起全場氣氛，場面熱鬧。

　謝票小隊甫現身戲院，歡呼聲此起彼落，觀眾們都大讚電影。眾演員隨即介紹自己角色，當Jeffrey指所演的叫細柱時，阿Dee鬼馬地說：「你接受自己係細柱。」全場觀眾隨即爆笑，阿Dee即時又補一句：「真係唔係吖嘛！你睇佢手臂幾粗？」主持人又問到大家想交換戲中哪個角色，Locker選擇區嘉雯出演的天文台台長，Jeffrey聽從觀眾意見選王敏德，阿Dee表示想做豪哥角色「煙鏟」，揚言可以掌摑Jeffrey，至於Ivana想做直昇機機師，豪哥則選莫文蔚，笑指做高官角色有得坐冷氣房演出，眾人答案幽默，聽到全場捧腹大笑。至於Louise就選擇演消防隊長的白宇，想嘗試一穿戲中橙色的輻射保護衣「A袍」。演員們隨即憶起穿上該服裝拍攝的苦況，當時他們均要先背著氧氣樽，再穿上其他裝備，非常炎熱焗促，另因為只有20分鐘氧氣提供，故他們經常要換氧氣樽才可繼續拍攝，相當辛苦。

　演員們又即場分享參演感受，大家都同聲表示因製作規模龐大，台前幕後各有困難之處，Locker難忘曾遇上惡劣天氣：「有日橫風橫雨，啲帳篷都吹跌，大家團結一心咁每人捉住一邊，就連導演明哥同老闆（監製江志強）都一齊幫手。」Natalie就指出災難電影少不了避難墟冚場面：「美術組搭出一個好真實嘅避難所，好細緻，我哋個日同超過300個群演一齊通宵拍，而我仲要演感情戲，好驚自己演唔好阻礙大家，但最後成功咗。」Ivana非常榮幸能夠參與大製作：「老闆同導演覺得呢套戲係一部講香港嘅電影，所以要求香港實景拍攝，我知道回收場係用上4幅不同空地拼湊而成，當中道具、場景製作都係一絲不苟。」豪哥再一次感謝出品人兼監製江志強：「令我最感動嘅係而家呢個市道，好似有個傻傻哋嘅投資人，拎咁多錢出嚟投資呢部戲，始終災難片比劇情片投資更多，個風險係好大，好熱愛電影嘅人先會咁做，故此希望大家多啲入場支持！」◇