參加《中年好聲音》出道的支嚳儀（Venus）昨日到新城廣播接受黎莉主持的《勁爆樂勢力》訪問，宣傳新歌《GottaTry》，Venus透露，演繹這首新歌甚有難度，所以錄音時錄了很多次，她說：「後尾我攞咗個蛋糕出嚟，叫監製同我一齊食，我同佢講我有少許後悔揀呢隻歌，不過我覺得自己係得㗎！」

　Venus希望新歌《GottaTry》能令大家聆聽自己的內心聲音，放膽去嘗試，黎莉問她曾幾何時有放低過？Venus表示：「放低咗十年，呢十年都無參加其他比賽，結完婚生B就走咗去創業，至於幾時燃亮番呢，就係炎明熹參加《聲夢傳奇》，我一聽到佢唱王菲嘅《百年孤寂》就起晒雞皮，佢有嗰種火喺到，我就話點解冇呢種比賽畀35歲以上嘅人參加，可能係吸引力法則，有日我去朋友嘅生日飯，見到JW（王灝兒），同佢講番呢件事，佢就攞個手機畀我睇《中年好聲音》嘅海報，佢叫我試吓，我就自己報名參加。」

　雖然忙於宣傳新歌，但Venus亦努力在做歌手和做媽媽之間取得平衡，明日沒有宣傳活動的她就會全日凑仔，「每晚12點至凌晨4點我就剪片，每朝早10點就起身湊仔，覺得最緊要心理健康，唔會覺得好疲倦，每個角色都好投入，開心有回饋。」

　早前「中一生」飯敍一同欣賞Venus新歌首播，並由周吉佩埋單，她感謝大家會互相支持，每逢有人出新歌，大家都會落力轉發支持，指顏志恒都有拍片支持她。現在大家目標都希望出個人Solo，團歌就再等下一步。她表示有留意網上評論，反應不錯，自己不會太計較流量，她說：「睇過啲網紅話唔錯，好多人覺得首歌好似為我度身訂造，評價好正面，唔係淨係話首歌好聽，覺得好似支嚳儀嘅性格，同埋話原來我唱廣東歌都OK。（老公覺得你首歌點？）佢話好期待我下一首，聽Demo時老公都喺度，覺得首歌好啱我，就好似揀婚紗呢件最襯你。」◇