Sammi鄭秀文近來的新歌歌名都很有意思，驟眼看在某程度上反映了Sammi的心態變化，就像新歌《萬物有時》，不期然會聯想和她自身的人生觀有關，不過Sammi説原來故事並不如此想當然，更説新歌與「至尊金曲」《我們都是這樣長大的》如出一轍，但與其説是延續，不如說是一個更深層次的答案。

　Sammi指這首歌其實早在一年半之前已收到音樂demo，但一直未有合適的歌詞，她説：「收到音樂部份之後，一直未搵到可以描述到自己心境嘅歌詞，直到收到而家呢份詞，個感覺就係『係佢喇！』。我覺得呢首歌可以套用於每一個人的生命入面，亦都好似幫《我們都是這樣長大的》呢個議題，搵到一個更深層次嘅答案。入面有兩句歌詞我特別喜歡：『善萬物自有得着時，花開落有滄桑故事。』每個人生命中都會遇到各自嘅困難，一啲滄桑無奈嘅事，果一刻可能覺得好悲傷，唔知點樣應付，但隨著時間過去，時間會俾一個最好答案你。其實每個人喺生命入面都會遇上一啲無力時刻，希望呢首歌可以俾到大家一個療癒作用，而唔係普通一首流行曲。」

　為著表達歌曲的內容意境，Sammi和MV導演細榮（莊少榮）曾研究很多不同的構想，她説：「結果我同導演細榮都有相同睇法，想用比較影像化嘅感覺去呈現呢首歌嘅意境，喺CG特技幫助之下，呢部份嘅感覺係比較深刻。整體希望帶出人喺生生不息嘅狀態入面，喺唔同景况期待萬物有時，喺每件事都有好嘅生機好嘅出路。去到故事結尾，希望可以帶出比較正面嘅感覺。」◇