小肥跳海飲鹹水幾乎嘔 驚覺與灰熊前世今生耐人尋味

 《紅VAN》原著作家Mr.Pizza的短篇力作、由導演劉翁執導的hmvod全新網劇《把砒霜留給自己》之單元《水底三十尺》,於本月二十日供網民免費睇。《水底》由小肥、灰熊(蘇宸褕)及《全民造星Ⅲ》參賽者「港版石原里美」鄭嘉欣(Christine)等主演,故事講述性情良善的小肥經常被灰熊等幾位好友欺侮,甚至在小肥面前公然踢爆飾演其女友的Christine其實係拜金港女、四處收兵,令小肥乜架都丟清,後來因為一次出海遇溺,令小肥驚覺與灰熊的前世今生耐人尋味。

 提起拍跳海浸親的戲份,小肥形容難到不得了,「因為沙又拮,工作人員為免我拮親腳有俾水靴我,但又唔可以穿崩,所以幾麻煩,尤其有幾幕喺船度跳落去更加唔可以有靴,船又窄又多利器要小心行,要赤腳,咁海有浪、條船四圍擺,嗰日又凍,好多嘢好難控制,拍咗好多次、跳咗好多次,幾乎拍到嘔。」戲中小肥常被朋友取笑、欺凌,他笑言現實中的身邊朋友都口賤:「但未去到欺凌,因為我都唔差,人哋mean我,我可能mean過人十倍,分分鐘俾我欺凌番。」

 飾演小肥女友的Christine,拍《水底》是她的處女演出,她覺得背對白最難,坦言拍時NG多,幸好小肥體諒,更安慰及鼓勵她,「其實我背熟晒啲對白,但係可能太緊張,同埋第一次拍,好多時食螺絲,緊張到一片空白。我有兩組戲,第一次嘅時候NG好多次,小肥係一個好好嘅人,佢冇唔耐煩,同我講『你放鬆啲啦,唔好咁緊張』,一啲壓力都冇俾我。」

 此外,ViuTV在《造星Ⅲ》內形容Christine係「港版石原里美」,Christine笑稱感到很開心,「石原里美係一個好靚、喺日本好當紅嘅女星,稱呼我係『港版石原里美』其實好開心,但都覺得擔當唔起呢個名。」她又稱自己在節目中好俾心機好努力,但對住鏡頭太怕醜,未能好好表現自己,不過她對參賽依然有信心。◇