鄧麗欣維繫遠距離戀愛 學問高深秘訣彼此信任

 生日快樂!十月十五日是鄧麗欣(Stephy)三十七歲正日生辰,過往每年歌迷都會舉辦生日會為偶像慶生,可惜今年受疫情影響,未能如常舉行聯歡聚會。不過一班歌迷們仍相當有心,適逢十月十一日是Stephy自家茶飲店「1011 SIP TEA」的成立兩周年的大日子,特意在當日到沙田最新快閃店「野生捕獲」老闆娘Stephy,順道為壽星女預早慶祝!

 Stephy當日突襲茶飲店「巡舖」兼為店舖兩周年舉行簡單的切蛋糕儀式,豈料一班歌迷早已在店裡等候壽星女登場,令她非常驚喜。粉絲們慶生亦不忘抗疫,大家謹守規定戴住口罩與Stephy單獨合照,並送上生日卡及小禮物,Stephy亦有回禮送上茶飲贈券。

 對於今年未能與歌迷舉行正式的生日會,Stephy難免覺得可惜:「原本以為今年未必同佢哋見到面,好開心今日有呢個機會,見個面影張相都好滿足。係有啲可惜,冇得同粉絲玩耐啲同傾偈,但冇辦法啦,因為疫情關係,大家都面對緊呢個問題,張就吓,希望疫情快啲過,或者下年補祝番。」 Stephy透露今年慶祝活動一切從簡,只與朋友及家人簡單食飯,願望是身體健康,一切回復正常:「我諗今年好多人都有呢個諗法,平時覺得好正常普通嘅事,今年要得到都唔容易,就算同朋友食餐飯都唔易。」

 提到與台灣男友邱勝翊(王子)分隔兩地,已有八個多月沒有見面,Stephy感嘆只能在透過視像慶生,名符其實是一對「螢幕情侶」:「今年佢四月生日我哋已經冇得見面,唯有視訊慶祝,我整咗個蛋糕喺螢幕前同佢慶生,唔知佢今次會唔會都係咁做呢?」 她表示要維繫遠距離戀愛是一門很高深的學問,秘訣是彼此的「信任」:「好多經歴過『Long-D』嘅朋友都明白,維繫真係冇乜其他方法,只能每日互相分享自己嘅生活日常,大家信任程度高啲,即使有地方上嘅距離,但個心嘅距離都唔會太遠。」◇