施明接受苑瓊丹訪問 曾諗過與鼎爺復合:「我都唔知點答你!」

 施明日前接受苑瓊丹邀請,現身香港開電視《開工大吉77》訪問,施明姐事先聲明防疫至上,需配帶口罩拍攝,及以「碰手踭」代替握手:「因為依家我唔止對自己負責,仲要顧埋啲孫仔,要同佢地父母交代,所以做訪問都要好小心!不過我同苑仔好耐冇見,聽到佢邀請,真係好開心佢記得我,所以一定要出嚟見佢。」施明姐自從二00六年後絕跡幕前,多年來都心癢癢想復出:「我好想拍番戲,冇戲癮又點入行呢?當年霑叔係我姨丈,佢話我讀乜鬼書,天生就係做戲,咁我咪叫佢介紹囉,佢一口拒絕話邊有自己人帶親戚入行,叫我考訓練班。不過讀緊訓練班時,有個導演睇中邀請我拍戲,所以一入行就拍電影。」

 讀書時曾學跳舞、功夫,入行即成為「打女」,亦因工作與李家鼎結緣:「當年我拍戲都好無知、好百厭,不太懂人情世故,有啲人就欺我,李家鼎出面幫我擺平件事。到底佢係睇中我先幫手,定係佢真係咁正義呢,要問番佢先知喇,但係好多人都話佢係好幫手,最終佢都幫咗我幾次。」期後二人婚姻出現問題,施明亦突然消失幕前:「因為當年兩個囝都拍戲,要搵個地方畀佢地專心讀書,所以去咗美國五年,當年呢個決定真係好勇敢,而家諗番都好驚。」

 她回憶昔日飄洋過海,落機沒有親友接濟,膽粗粗打電話予胡金銓導演求助:「其實我同佢都唔熟,當年佢話我嗰樣唔適合拍戲,所以冇合作過!但人生路不熟,唯有求下人啦,之後佢話叫我住幾日酒店,因為佢要返台灣做身體檢查,返嚟介紹我開工。點知等咗成個月都冇聲氣,最終帶埋兩個仔出唐人街行吓,撞到另一個導演,見到華人真係好開心,佢話我知原來胡金銓死咗,我成個月都冇買報紙,乜都唔知!」為愛兒讀書,施明放下身段從新出發,美國試鏡爭角色拍廣告、電影配音賺錢,加上「鼎爺」補貼維持生活。

 施明大讚前老爺廚藝了得,鼎爺盡得真傳:「佢煮嘢食同書法都好得,所以李家鼎都好叻。以前就我負責煮飯嘅,慢慢就變工人煮,所以都唔記得晒啲食譜,而佢就有朋友嚟先去廚房露兩手。頭先苑仔問我有冇諗過復合,我都唔知點答,有冇諗過都答唔到,至於佢有冇明示暗示,我唔知㗎!我份人糊糊塗咁,有時講到白都聽唔清楚㗎,我唔係詐癲扮傻,一向都係傻傻地。佢係我前夫,再見做返朋友?我做唔到,但佢又係我嗰仔嘅爸爸,咁即係親人囉。」◇