鄭艷麗自爆患上厭食症 被送入ICU留醫悶到爆炸

 四十九歲的鄭艷麗,曾在一九九0年代拍過多部三級片,亦當過台灣富商黃任中的契女。二00四年黃任中逝世後,鄭艷麗失去經濟支柱,返港後轉行,曾在快餐店打工,又到過越南開咖啡店。近日鄭艷麗在社交平台自爆患上厭食症,體重跌至九十幾磅,一度被送入ICU,情況嚴重,至今仍然留醫。

 鄭艷麗留言:「讓大家講解我嘅病情狀況、是患咗厭食症、但係不是不喜歡食嘢的厭食症、是身體內排斥食物的厭食症、因為身體內沒營養、亦無法吸收到營養、因為我一進食就會嘔、咁點解嚴重到入ICU呢!因為身體嘅鉀指數超低……只有一……正常人應該有四至六的、經過昨天吊咗好多嘢、腳又有吊手又有吊、今天上返二點幾啦!但係仲未離開得ICU……大家放心我會努力嘅。點解我會向大家講……這件事、是如果我萬一不在世上、我的好朋友和粉絲、都能明白我的狀況、不是看到報道亂寫一通的事情、我就心安啦!」

 上周五已離開ICU,鄭艷麗再發文報告情況:「轉咗普通病房、醫生話……仲要睇多幾日確定下個病情、先可以出院、但啲手手腳腳都瘀晒、因為係ICU又要吊又要一個鐘頭抽一次血、就變成咁啦!」

 鄭艷麗前日再次上載照片,並留言︰「早晨,前日我好友張靜小姐來探我,請我食海南雞飯,真好味,又攞咗好多東西給我,終於可以沖涼、刷牙洗面了……爽爽爽……檻埋火盆就完美,講笑。昨天去做咗個腦掃描,未出報告,我的鉀指數,還是上不到正常的,現在等明天內分泌專科來看我,所以都唔知要搞幾多個事情先可以出院,還有醫生說...我的鉀指數沒正常亦不能出院,他說這樣好危險,但係我唔想再抽血啦!你們睇吓我隻手有幾多個針窿……又瘀晒又腫又痕,還有我在醫院悶到爆炸。」◇