何建曦花五年時間創作新歌

 期待多時,寰亞唱作歌手SoulJase(何建曦)終於帶着他的首張個人EP專輯《藍染Self Portrait》與歌迷見面,SoulJase直言花了五年時間創作碟內作品,而碟內更破天荒地包含一篇七千多字的文案,內容更有描述主角被校園欺凌、人妻係怪獸及經歷SM情節,實在令人意想不到。

 SoulJase解釋:「唱片內大概七千字嘅文案,其實就唔係講我自己嘅,係一個故事線,取自於我今年內會推出嘅一本愛情小說,入面有好幾個章節,我將其中一個章節抽咗出嚟,因為呢段故事可以串連起呢五首歌,係我創作呢個故事時借題發揮出來嘅,而唔係發生過喺我身邊。」至於情節如此精彩豐富,可有想過拍成網劇、微電影?「我寫上一本小說嘅時候已經有好多畫面上嘅構想,我覺得歌曲可以表達到嘅始終有限制,而呢個小説又幾有畫面感,所以若果可以拍成微電影,相信可以畀到大家更大嘅思想衝擊。」

 說到手上五首花了五年時間創作的新歌,SoulJase不禁興奮地說:「我由二0一五至今歷時五年,構想人從慾望至絶望的過程,從而揭露人性陰暗面。《Bounce Back》主題係講謊言,《阿愁》係講哀愁,《禁區》係講慾望,而點題之作《藍染》就係三個議題嘅總結,講社會上大家點樣互相感染,因果循環,所有嘢都會傳翻去自己身上。而最後一首歌就係講一啲毀滅性嘅議題。」

 而SoulJase今次拍攝唱片封面的服裝,其中一套全人手製作的西裝外套是他最喜歡的,他說:「呢件衫特別嘅係佢每一面每一角度睇都唔一樣,好呼應唱片嘅解構主題,每一個角度都係人嘅唔同面相,好豐富。」不過SoulJase的好拍檔導演Douglas卻喜歡攪攪新意思,命人用咖啡粉扮成泥土,灑在SoulJase面上,以呼應SoulJase所説的毀滅性議題,對此,SoulJase回應説:「因為唔係真係泥,所以其實係好有咖啡香味,一啲都唔辛苦。」◇