苑瓊丹嚇窒余香凝 靠朋友買口罩抗疫情

 余香凝(Jennifer)現身香港開電視,接受苑瓊丹主持的節目「開工大吉77」訪問,Jennifer笑指苑仔轉數快,笑言自己招架不住:「今日見佢扮師傅,都嚇咗一跳!佢把口好勁,加上我又轉數慢,最怕係令到個節目唔好睇!其實我都把握機會同對方請教做戲心態,有前輩教路會易行啲!」

 余香凝就話呢排疫情肆虐,自己忙於宣傳新歌外,亦要為家人撲口罩:「我周圍問朋友邊度有口罩,邊個去旅行幫手買比我,咁就未去到絕路要排口罩,不過我心理上有壓力,成日認住自己有啲咳、喉嚨痛!呢排都要宣傳新歌,唯有唔洗開工就閉關,慳番個口罩。朋友笑我搵命搏做宣傳,其實係想帶正能量畀人,希望聽完我呢首輕快嘅歌,大家都開心啲!」

 苑仔就大讚余香凝乖巧,認為對方前途無可限量:「我見到佢諗番起我以前,覺得佢好似我,如果佢矮番小小,佢成個仕途就會好似我㗎啦!哈哈!其實呢行要好忍同狠,冇工開要忍得,有工開就狠!」

 因為新冠肺炎情況,苑仔工作都大受影響:「本來要去台灣拍戲,本來傾緊幾時去隔離等開工,都未傾完已經禁止入境。咁算啦,而家咪休息一下,盡量保持開心,同朋友見面第一句就問有冇口罩,慢慢買番多少。」◇