【特訊】歐霸盃分組賽，昨晨三支英超球隊中曼聯同阿仙奴都贏波，首度亮相歐霸的狼隊就落敗。曼聯在Ｌ組賽事，主場一比０擊敗艾斯坦拿。上屆亞軍阿仙奴在Ｆ組作客三球淨勝法蘭克福。阿仙奴同樣靠年輕球員贏波，十八歲翼鋒沙卡今季首次踢正選就有好表現，取得一個入球並參與炮製另外兩個入球，分別由祖韋洛克及奧巴美揚建功，協助兵工廠旗開得勝。

　其他賽事，三屆冠軍西維爾，在Ａ組作客三比０擊敗阿塞拜疆的卡拉巴克，「小豆」靴南迪斯入精彩自由球。在Ｈ組，愛斯賓奴主場一比一迫和匈牙利的費倫斯華路士。中國前鋒武磊正選為愛斯賓奴踢足全場，他多次製造威脅，但未能取得入球。愛斯賓奴在開賽十分鐘輸烏龍波。華加斯到下半場扳平。

　比錫達斯Ｋ組首仗作客斯洛伐克的巴迪斯拉華，開波十四分鐘主隊門將大腳開出龍門球，本來比錫達斯後衛已經包抄，但曾服役利物浦的門將卡利奧斯竟衝出禁區想用頭槌解圍，他錯判高度，結果將波頂後，卡利奧斯失平衡撞到自己隊友，主隊前鋒「多謝」就將球射入空門。

　比錫達斯送禮先失後，雖然一度連入二球反超前，但下半場又被追平，最終補時階段失多二球，作客二比四慘敗而回。賽後全球網民瘋狂恥笑卡利奧斯。◇