蓋鳴暉愈學粵劇愈孤獨

 粵劇名伶蓋鳴暉出席慈善折子戲記招,透露本身月尾在新光戲院有多場演出,是次特別為慈善加開早場,演出四套折子戲,揚言要記不同曲目都辛苦,笑言也會發台瘟,她說:「點解唔會?希望發得最少,試過有幾秒腦真空,會冇厘搭霎唱啲大概嘢填咗佢,執生,要幾秒先回魂,touchwood希望唔好咁狼狽。」笑言一般觀眾唔會知唱錯,只有自己和樂師知,不過都試過有觀眾發覺,會讚她執得靚。

 蓋鳴暉明年是出道三十年,三十年來無停過唱戲,是好的紀念,好的回顧,覺得高處不勝寒,愈學愈孤獨,會不停反醒自己:「粵劇係傳統藝術,唔可以誇張和離題,我都睇過一啲新派嘅話劇和舞台劇粵劇,自己都接受到,加入兩三成科技效果。(好似李居明早前加入同性戀話題嘅劇目?)接受到,情節唔過火,略過之嘛!人間有情,唔可以唔面對。做戲係表演程式,無所謂,括出去,健康正面,唔猥瑣就得。」◇

免費報紙資料僅提供最近兩年之內容,更久遠之歷史資料瀏覽,請登記申請館藏會員訂閱計劃。