麥包趕返香港做義工 羅子喬李莉瑪姫受小朋友歡迎

 快到中秋佳節,前日(九日)一眾善心藝人包括麥長靑(麥包)、羅子喬(Bella)和瑪姫特地到大埔匡智會和一班小朋友開派對,一起慶祝。事前,小朋友們知道將有明星到訪,表現興奮,都在猜將見到哪個平日只在電視上出現的藝人?當他們見到麥包出現,大派特別版Ultraman鹹蛋超人月餅時,即時大叫:「嘩!麥包哥哥嚟咗呀!」開心上前跟他握手,又不斷要求和麥包 selfie,十分純真可愛!而藝人羅子喬、李莉和瑪姫亦忙着派燈籠和月餅,一眾小朋友看着她們說:「姐姐,你好靚呀!」逗得二人笑逐顏開。

 其實麥包近日忙於在內地工作,但特地於前晚趕返香港,為的就是出席這個中秋探訪活動,他表示最重要是小朋友開心,「我同譚玉瑛姐姐一班舊同事啱啱先慶祝《閃電傳真機》三十周年,估唔到而家啲小朋友仲知道我係『麥包哥哥』,佢哋真係好天真活潑,小朋友嘅世界最簡單。見到佢哋開心,自己都跟住開心!」

 近月忙於拍攝電影《任性的你》的Bella就笑說:「小朋友好鍾意問好多問題,同佢哋傾偈,覺得佢哋識好多嘢。其實小朋友最希望有多啲人陪佢哋玩,陪伴係最重要。」廣告女皇李莉最近都忙於拍廣告,她自言很喜歡小朋友,「見到佢哋好認真跳舞畀大家睇,真係好可愛!係小朋友令我哋大人都變得特別開心。」而瑪姫平日都不時做善事,之前就參與過賣旗活動,她說:「只要有時間,我都會出席這些探訪活動,因為可以親身接觸小朋友,同佢哋一齊玩,同單單捐錢嘅感覺好唔同,係特別開心啲嘅!」

 除了幾位藝人,首位踏上KBL(韓職藍球)的香港球員周健宏也有出席派送月餅,小朋友對這位身高一百九十四釐米的大哥哥都大感好奇,不斷抬頭看他。周健宏笑言:「我都習慣大家對我嘅身高有好奇,同小朋友相處係好得意,希望有機會教佢哋打籃球啦!」◇

免費報紙資料僅提供最近兩年之內容,更久遠之歷史資料瀏覽,請登記申請館藏會員訂閱計劃。