容祖兒演唱會喜事重重

 容祖兒演唱會踏入第九場,昨晚演唱會上喜事重重,祖兒請來好姐妹TWINS、及好兄弟關智斌任特別嘉賓,Twins先大爆超多人想追祖兒,只要祖兒答應,隨時可以搵個好歸宿。關智斌更在台上正式宣佈,他九月十四日的個人紅館演唱會昨日開賣全部爆滿,決定加開九月十三號一場!昨天(十四日)下午開售。

 昨晚祖兒請特別嘉賓出場,介紹他們為重量級女子組合,「我地一齊長大,我們經歷的不是你們能夠想像咁多,我曾經係佢地演唱會上飲大咗,上次演唱會真係好好玩,真係要好信得過,好有親切感,好有歸屬感,我先夠膽死台上面飲大咗!今日唔知佢地點對我,希望佢地錫住我啦」然後唱「風箏」一曲邀請Twins上台。

 孖妹出現馬上獻唱「大紫大紅」一曲,令全場為之哄動,歌畢,阿Sa話:「我地今日其實呢帶的大禮來畀你,我想話呢雖然容祖兒冇乜緋聞,你唔好以為佢冇人追,真係好多人追佢㗎,今日已經有幾個係到。」祖兒嚇一嚇,阿嬌就反問「你係咪想講日本個個?」阿Sa問:「係咪真係講得㗎?」祖兒馬上搶白:「唔係,掩住你地個嘴,佢地(觀眾)冇人想聽我緋聞。你試下再講,我拿對鞋塞住你個嘴......」

 阿Sa不肯罷休,「做乜啫!我想話好多人鐘意你,但你未同人開始就終止人地關係....」

 祖兒:「我要專注事業,如果拍拖點做咁精彩演唱會!影響曬囉!」

 阿Sa問觀眾:「大家都好想祖兒可以搵到個好歸宿,係咪先?」全場馬上起哄應同,至於主角就低頭扮怕醜:「我真係龜縮.......」

 繼而Twins話,「算啦,但係鐘意你的人裡面,其中有一個好靚仔,今晚死要同你唱歌,佢好多腹肌.....」觀眾都已經估到係關智斌,祖祖就話,「咁呢個可以拿出來見下大家嘅,佢係邊?係下面?咁我要出力請佢上來」然後狂做標童動作,笑死觀眾。接著關智斌升出來四人齊唱《死性不改》,全場high爆!

 歌曲終結,祖兒問Kenny,你做咩唱得咁興奮?阿Sa代答,「佢要彩排定啦,佢九月自己紅館演唱會呀。」阿嬌就搶住話:「係呀,中秋節呀!佢已經賣曬啦!而家加場!」而Kenny就跪拜嬌姐,「嬌姐,你畀個機會我自己講啦…」繼而他興奮站在台中,高舉勝利手勢大叫:「大家好!關智斌KennyisBORN演唱會而家正式宣佈加場!」全場萬多觀眾都戥Kenny開心,瘋狂歡呼。祖兒更興奮到扮大叔跳舞,但比阿sa拉起身話,「你咪跳啦,一陣整親腰呀。」

 嬌:「你而家加場,個演唱會有咩吸引人先,點同大家賞月?」

 kenny:「你唔使賞月啦,你日日係屋企有個Michael實的的畀你賞啦!」(昨晚阿嬌老公Michael也坐於觀眾席欣賞。)

 繼而Twins及祖兒齊齊宣佈,Kenny九月的演唱會,已經預了晚晚都會到場一齊玩,「我地都係到,有你一定有我地三個!」◇