馬浚偉暴曬平安鐘賣旗

 馬浚偉昨日為長者安居協會在旺角鬧市賣旗籌款,雖然時近中午烈日當空,不過馬仔暴曬成句鐘依然笑容十足,還邊賣旗邊與市民合照,現場有如小型粉絲聚會,好不熱鬧。

 馬仔接受「香港開電視」訪問時稱,好開心見到香港人依然有愛心、依然肯主動買旗,對於近期的社會紛爭,馬仔承認本身心情是有受到影響,亦會感到不開心,不過他感恩有自己的信仰,會將負面情緒交託給神,然後繼續充滿正能量同開開心心地生活。

 馬仔坦言:「我唔希望唔開心、憤怒、仇恨經過馬浚偉傳出去,所以我有個行動做緊,就係每日都會同在街上遇到的人笑一笑,如果有眼神接觸的,我仲會講聲hello,如果大家覺得我傻或者烚熟嘅,咁你咪當我烚熟囉,至緊要大家開心,如果大家覺得咁做係可行嘅,都可以照做㗎!」

 說到十月尾舉行演唱會,馬仔稱正如火如荼籌備中,並透露說:「演唱會將橫跨我正日生日,當晚我已請左我最愛的女神周慧敏來做我嘉賓,另外亦會請我好欣賞的年輕歌手,如釗峰、余香凝等出席。」

 而最特別的是馬仔每場演唱會都有一個環節畀有天份的基層市民表演,馬仔稱:「好似有個老人家跳舞好叻、又有個彈琴好叻,我希望帶出個訊息係,即使係基層市民,都可以有佢地既舞台,我唔介意分享自己的舞台出來畀佢地發揮!」◇