溫碧霞入行36年舉行個唱 答謝香港粉絲不離不棄支持

 歌、影、視三方面一樣掂的溫碧霞(Irene)當年十五歲憑電影「靚妹仔」一炮而紅,再因電視劇「火玫瑰」中海潮角色更紅上加紅,隨即被唱片公司發掘Irene不單止識演戲,歌喉仲好出色,歌聲更被喻為似鄧麗君,Irene當年推出的唱片銷量相當不俗,仲熱賣到大陸,由九一年開始推出第一張大碟「溫碧霞Irene」,之後在短短幾年間共推出過八張個人唱片。

 其後因在內地發展,及專注拍電視劇和電影,暫停出唱片好一段時間的Irene,為答謝三十六年來香港的粉絲一直以來支持,決定於六月十九日晚假旺角麥花臣場館舉行首個個唱「溫碧霞海潮演唱會二0一八」,門票昨日(十五日)正式公開發售,每張門票分別為六百八十元、四百八十元。

 早前Irene為演唱會拍攝了兩款海報,其中一款背景佈滿鮮花,另一款則赤膊玩黑白feel,最後Irene選擇了露肩的型格黑白feel作為今次演唱會海報,Irene解釋:「黑白feel好似我嘅性格咁有個性,我想我嘅演唱會畀大家睇到真正的溫碧霞,唔單止識演戲,其實我仲識唱歌同跳舞。」Irene並率先透露到來會唱自己演過的電影、電視劇主題曲,與及其他歌手的經典金曲。◇