古巨基大難不死望有後福 觀眾不願離開安歌兩次才能完騷

 古巨基we我們世界巡迴演唱會尾場昨晚結束,雖然是負傷上陣,但基仔依舊落力唱到唔想停,觀眾完騷亦不想離開,結果安歌兩次後才真正完騷。今次開騷發生意外,基仔坦言非常感恩,笑稱自己大難不死必有後福,不過見過鬼也怕黑,日後上舞台會非常小心,但凡有窿有洞的地方也一定會閃避。

 尾場基仔大班圈中友好到場支持,繼有英皇老闆楊受成,溫碧霞,張艾嘉,唐詩頴,張智霖,袁詠儀,林奕匡,小肥,湯寶如,樊亦敏,羅力威,雨僑,李克勤,森美等。台上基仔請來好朋友鄭伊健當嘉賓,兩人合唱《一個為你甘去蹈火海的人》,唱到最後基仔擁抱伊健,肉緊話:「今日再度來共你從新,激烈擁吻!」然後兩個人作狀嘴嘴,十分搞笑。基仔指認識伊健這麼多年,這個朋友真的是一個為他甘去蹈火海的人,無論他有甚麼需要幫忙,伊健都一定答應,像他搞時裝,伊健二話不說去上海為他當嘉賓模特兒,老婆餅店賣月餅,伊健人在沙漠拍戲,都拿著月餅拍照說,「嘩,好好味呀」,這個伊健哥哥所做一切,令他非常感動。最後基仔找出一張伊健跟他作拍劇的舊照,照片中伊健搞笑用手拉著基仔褲頭,原來當年基仔被許紹雄捉弄,差點被拉甩褲,伊健在有人影相時就出手相助,為基仔兜住褲頭免他走光。兩人於觀眾面前再重演照片中動作合照,非常搞笑。

 昨晚基仔唱到最後安歌部份,舞台上的大幕升降出現問題,慶功宴上基仔接受訪問,談到大幕升降又出事,基仔笑道,「個幕壞咗小小,比起我墮台個意外,真係好小事,我已經睇得好透啦,我每晚都同我老婆講,其實我真係好好好好好好彩,因為真係可以好嚴重,如果係傷到頭,手或者腳呀咁,但係我竟然係好彩到只係拉傷左頸背肌肉,大難不死,希望必有後福啦。這次意外,好多朋友好關心我,出事個晚朋友即刻同我搵醫生啦,陪我去醫院啦,好多其他朋友每日電話不斷問侯,真係好感動,好多謝佢地。」

 基仔謂當時老婆有冇喊,他並不知道,「當時邊個係我隔籬,我都唔知。個人好亂,剩係諗頂得住咁就繼續啦,老土的講句,the show must go on,咁多觀眾為我買票而來,我唔想個騷暫停佢地失望。」

 傷後每晚基仔也有醫師為他做手法治療,助他放鬆肌肉,西醫又有給他止痛藥及放鬆肌肉藥,助他可以好好睡覺,問到他完騷後是否會休息一段日子養傷?基仔話,「可以休幾日啦,十九號就已經要巡迴去堪江繼續演出。醫生話拉傷的地方,最少也要兩星期才可以慢慢康復。而家我見過鬼都怕黑㗎啦,無論去邊演出,我都一定唔想再見到個窿,所以我一定會好小心避開升降台位。」◇